मुंबई : कोरोना उपचारासाठी महाराष्ट्रात पूल टेस्टिंग’ आणि प्लाझ्मा थेरपी उपचाराला केंद्रीय आरोग्यमंत्र्याकडून मान्यता मिळाल्याची, माहिती आरोग्यमंत्री राजेश टोपे यांनी आज दिली.
याबाबत अधिक माहिती देताना आरोग्यमंत्री टोपे म्हणाले, कोरोना प्रतिबंधाचा आढावा घेण्यासाठी केंद्रीय आरोग्यमंत्री डॉ. हर्षवर्धन यांनी आज दुपारी देशातले सर्व आरोग्यमंत्री व सचिवांशी व्हीडीओ कॉन्फरन्सिंगद्वारे संवाद साधला.
पोर्टेबल पल्स ऑक्सीमीटर व एक्सरे चाचणीच्या मदतीने कोरोना रुग्णाचे लवकर निदान करणे शक्य होईल आणि त्यातून मृत्यूदर कमी करता येऊ शकेल, असा मुद्दा या बैठकीत महाराष्ट्राच्या वतीने मांडण्यात आला. त्याचबरोबर पीपीई (पर्सनल प्रोटेक्टिव्ह इक्विपमेंट्स) किटचे निर्जंतुकीकरण करून त्याचा पुर्नवापर करण्यासाठी मुद्दे सुचविण्यात आले. त्याचे विशेष कौतुक करण्यात आल्याची माहिती श्री.टोपे यांनी दिली.
राज्यातील खासगी वैद्यकीय महाविद्यालयांमध्ये कोरोना चाचणी सुरू करण्याच्या मागणीला केंद्रीय आरोग्यमंत्र्यांकडून सकारात्मक प्रतिसाद मिळाल्याचे त्यांनी सांगितले
