सरकारी खात्यातील बदलत्या नियमांची झळ सामान्य कुटुंबावर कशी पडते, याचे वास्तव ‘ट्रकभर स्वप्न’ या आगामी सिनेमात आपल्याला पाहायला मिळणार आहे. अभिनेते, चित्रपट- कलादिग्दर्शक, दिग्दर्शक आणि निर्माते नितीन चंद्रकांत देसाई प्रेक्षकांना प्रत्येकवेळी काहीतरी वेगळे देण्याचा प्रयत्न करतात. असाच एक प्रयत्न त्यांनी ‘ट्रकभर स्वप्न’ या चित्रपटाच्या माध्यमातून केला आहे. आयकॉनिक चंद्रकांत प्रॉडक्शन प्रायव्हेट लिमिटेडच्या बॅनरखाली हा सिनेमा तयार होत आहे. एका महत्वाकांक्षी तरुणाच्या जीवनावर तो भाष्य करतो. मकरंद देशपांडे प्रमुख भूमिकेत असून, क्रांती रेडकरची देखील एक महत्वपूर्ण व्यक्तिरेखा सिनेमात आहे. प्रमोद पवार दिग्दर्शित हा सिनेमा सामान्य मुंबईकरांच्या भावना आणि त्यांच्या महात्वाकांक्षेवर आधारित आहे. स्वप्न पाहणाऱ्या प्रत्येक सामान्य नागरिकांची हृदयस्पर्शी कथा या सिनेमात मांडण्यात आली आहे.
