डोंबिवली, (प्रशांत जोशी) : माजी शिवसेना डोंबिवली शहरप्रमुख, शिवसेनेचे नाशिक जिल्हा संपर्कप्रमुख आणि शिवसंस्कृती प्रतिष्ठानचे संस्थापक अध्यक्ष भाऊसाहेब चौधरी यांच्या माध्यमातून गेल्या वर्षी घेण्यात आलेल्या श्री गणेशदर्शन स्पर्धेमध्ये गोग्रासवाडी भागातील शिवनेरी गणेशोत्सव मित्रमंडळाने प्रथम क्रमांक पटकावला.
स्पर्धेचा पारितोषिक वितरण समारंभ टिळक पथ येथील ब्राह्मण सभेमध्ये संपन्न झाला. यावेळी व्यासपीठावर खासदार श्रीकांत शिंदे, महापौर विनिता राणे, जिल्हा प्रमुख गोपळजी लांडगे, स्थायी समिती सभापती राहुल दामले, शिवसेना शहरप्रमुख राजेश मोरे, नगरसेवक दिपेश म्हात्रे, महिला आघाडीच्या लताताई पाटील, कविता गावंड, उपशहर प्रमुख संतोष चव्हाण, विवेक खामकर, अरविंद बिरमोळे आदी मान्यवर उपस्थित होते.
गणेशोत्सव मित्र मंडळांच्या माध्यमातून कार्यकर्ता घडत असतो, ती एक कार्यशाळा असून त्यातून अनेक उदयोन्मूख कार्यकर्ते राजकारणासह समाजकारणाला मिळाले आहेत असे प्रतिपादन प्रमुख पाहुणे आबासाहेब पटवारी यांनी केले.
राजाजीपथ गणेशोत्सव मंडळाचा द्वितीय तर पश्चिमेकडील गोकूळ मित्र मंडळाला तृतिय क्रमांकाचे मानकरी म्हणुन गौरविण्यात आले. तसेच दत्तनगर येथील शास्त्री हॉलमध्ये भरविण्यात येणा-या गणेशोत्सव मंडळाला आणि सुनिलनगर गणेशोत्सव मंडळाला उत्तेजनार्थ पारितोषिक देऊन सन्मान करण्यात आला. श्रींच्या आकर्षक मूर्तीसाठी पश्चिमेच्या जाधववाडी मित्र मंडळ आणि विशेष पारितोषिक गणेश अपार्टमेंट मित्र मंडळाला देण्यात आले.प्रथम क्रमांक पटकावणा-या मंडळाला रोख रक्कम ३१ हजार, द्वितीय २१ हजार रोख, तृतिय क्रमांकाला ११ हजार रूपये तर उत्तेजनार्थ आणि आकर्षक मूर्तीसाठी ५ हजार रूपये रोख रक्कम देण्यात आली. गणेश अपार्टमेंट मित्र मंडळाला अडीच हजार रूपयांचे विशेष पारितोषिक व सगळया विजेत्यांना आकर्षक सन्मानचिन्ह, प्रमाणपत्र देखिल देण्यात आले.
प्रख्यात व्यंगचित्रकार गणेश जोशी, कलेचे अभ्यासक शिक्षक विवेक ताम्हणकर वास्तूविशारद निनाद वैद्य, पत्रकार अनिकेत घमंडी व चित्रकार संजीव वेदक आदींनी या स्पर्धेचे परिक्षक म्हणून काम पाहिले होते.
यावेळी खासदार शिंदे, भाऊसाहेब चौधरींसह परिक्षकांची मनोगते व्यक्त झाली. याही वर्षी अशाच पद्धतीने स्पर्धा भरविण्यात येणार असून यंदा १०० मंडळ सहभागी होतील असे उद्दीष्ट असल्याचे चौधरी यांनी सांगितले.