रत्नागिरी : माझा सनातनशी संस्थेशी संबंध जोडणे म्हणजे हे एक षडयंत्र असून यामागे शिवसेना आणि महाराष्ट्र स्वाभिमान पक्षाचा हात असल्याचा थेट आरोप काँग्रेस-राष्ट्रवादी काँग्रेस आघाडीचे रत्नागिरी-सिंधुदुर्ग लोकसभा मतदारसंघातील उमेदवार नवीनचंद्र बांदीवडेकर यांनी केला आहे. आज रत्नागिरीत झालेल्या पत्रकार परिषदेत बांदिवडेकर यांनी याचा उलगडा केला. या पत्रकार परिषदेला राष्ट्रवादी काँग्रेसचे कुमार शेट्ये, काँग्रेसच्या विधान परिषद आमदार हुस्नबानो खलिफे, राजीव किर आदी पदाधिकारी उपस्थित होते..
आघाडीकडून रत्नागिरी सिंधुदूर्ग लोकसभा मतदार संघासाठी नवीनचंद्र बांदीवडेकरांच्या नावाची घोषणा झाली. त्यानंतर काहीच दिवसांत बांदीवडेकरांचा संबध थेट सनातनशी असल्याचा आरोप झाला आणि सोशल मिडियावरही बांदीवडेकर ट्रोल झाले. नेटिझन्सनी काँग्रेस आणि बांदिवडेकर यांच्यावर टीकेची झोड उठवली. काँग्रेसचा उमेदवार सनातनचा समर्थक? असा थेट आरोप झाला. राष्ट्रवादी काँग्रेसच्या जितेंद्र आव्हाड यांनीही बंदीवडेकरांच्या उमेदवारीवर आक्षेप घेतला. त्यामुळे बांदिवडेकरांची उमेदवारी धोक्यात आली होती. काँग्रेस हायकमांडकडने देखील बांदिवडेकरांकडे स्पष्टीकरण मागितले होते. मात्र सनातनशी आपला काहीही संबंध नसल्याचं सांगत केवळ समाज म्हणून आपण त्यावेळी तिथे गेलो असल्याचं बांदिवडेकरानी स्पष्ट केलं होतं. त्यामुळे एवढया सर्व घडामोडीनंतर काँग्रेसने बांदिवडेकरांची उमेदवारी कायम असल्याचं जाहीर केलं होतं. एकूणच या वादानंतर बांदिवडेकरानी आज पहिल्यांदाच रत्नागिरीत घेतलेल्या पत्रकार परिषदेत हे सर्व षडयंत्र असल्याचा आरोप केला. रत्नागिरी- सिंधुदुर्ग लोकसभा मतदार संघात शिवसेना आणि स्वाभीमान पक्षाला आपली उमेदवारी डोईजड जाईल म्हणून माझा सबंध थेट सनातनशी जोडला गेला. यामागे शिवसेना आणि स्वाभिमानचा हात असल्याचा थेट आरोप नवीनचंद्र बांडीवडेकरांनी केला. माझं तिकिटंच कापलं जावं हा यामागे विरोधकांचा उद्देश होता. तसेच एवढं करूनही उमेदवारी कायम राहिली तर काँग्रेसची जी पारंपारिक मतं आहेत ती बांदिवडेकरांपासून दूर जावीत हाही यामागे विरोधकांचा उद्देश होता असा आरोप बांदिवडेकरानी केला आहे.
30 मार्चला भरणार अर्ज
आपण 30 मार्च रोजी आपण आघाडीकडून उमेदवारी अर्ज भरणार असल्याचं नविनचंद्र बांदिवडेकर यांनी आज स्पष्ट केलं.
