रत्नागिरी, 13 June : रत्नागिरी जिल्ह्यात शुक्रवारी रात्री मुसळधार पाऊस पडला. विशेष म्हणजे रत्नागिरी तालुक्यात विक्रमी पावसाची नोंद झाली आहे. रत्नागिरी तालुक्यात अवघ्या 2 तासात 9 इंचापेक्षा अधिक पाऊस पडला आहे. रत्नागिरी शहर आणि परिसरात शुक्रवारी रात्री मान्सूनच्या पहिल्याच दिवशी विक्रमी पावसाची नोंद झाली. अवघ्या दोन तासाच्या कालावधीत रत्नागिरी 237 मिलिमीटर पाऊस पडला. यामुळे शहरातील अनेक भाग जलमय झाले होते.
नैऋत्य मोसमी पावसाचे रत्नागिरी जिल्ह्यात आगमन झाल्यानंतर सर्वच ठिकाणी पावसाने हजेरी लावली असून जिल्ह्यातील सर्व तालुक्यांमध्ये कमी अधिक प्रमाणात पाऊस पडत आहे. गेल्या 24 तासांत जिल्ह्यात सर्वाधिक पाऊस रत्नागिरी तालुक्यात 237 मिलिमीटर नोंदला गेला. त्याखालोखाल राजापूर तालुक्यात 160 मिलिमीटर पावसाची नोंद झाली.
तर मंडणगडमध्ये 12 मिमी, दापोली 33, खेड 9, गुहागर 58, चिपळूण 33, संगमेश्वर 28, लांजा 59 मिमी पावसाची नोंद झाली आहे.
