मुंबई : स्वातंत्र्यसैनिक डॉ.परशुराम पाटील कलाकेंद्र ही शैक्षणिक, सामाजिक, सांस्कृतिक कार्य करणारी संस्था आहे. या संस्थेच्या ‘कलाश्रम’ अंतर्गत ‘अभियान सन्मान’ हा उपक्रम प्रत्येक महिन्याच्या शेवटच्या आठवड्यात राबविण्यात येतो. ३० ऑगस्ट २०१९ ला या उपक्रमाचे अठरावे पुष्प आहे. स्वत:बरोबर समाजासाठी वैविध्यपूर्ण काम करणार्या व्यक्तींची या उपक्रमात दखल घेतली जाते. त्यांच्या कर्तृत्त्वाचे आलेख मांडणारे ‘दखलपत्र’ त्यांना देण्यात येते. यंदा साहित्यिक लक्ष्मण लोंढे, कलानिर्देशक प्रकाश अनभवणे, आदर्श माता व सुगरण हौसाबाई सन्नके, ज्येष्ठ निर्माते सुधीर पाटणकर यांचे ऑगस्ट २०१९ महिन्यातील स्मृतीदिनाचे निमित्त घेऊन हे ‘दखलपत्र’ लेखक राजीव जोशी, चित्रकार गिरिश कुळकर्णी, उद्योजिका अमृता चव्हाण आणि निर्माते, दिग्दर्शक अशोक पावसकर यांना विविध क्षेत्रात सर्वोत्तम काम केल्याच्या निमित्ताने दिले जाणार आहे. अखिल भारतीय मराठी नाट्य परिषदेचे अध्यक्ष व निर्माते प्रसाद कांबळी यांच्या हस्ते सन्मानपूर्वक हे दखलपत्र दिले जाणार आहे. हा कार्यक्रम शुक्रवार, ३० ऑगस्ट २०१९, सायंकाळी ७ वाजता पु.ल. देशपांडे कला अकादमी, रवींद्र नाट्य मंदिर, ३ रा मजला, ऍनिमेशन (अरवाना) हॉल, प्रभादेवी येथे होणार आहे. अभिनेत्री, नृत्यांगणा कादंबरी वाजे ही या कार्यक्रमाचे सूत्रसंचलन करणार आहे. दखलपत्र वाचनात हर्षवर्धन राज, प्रणय डाळे, निता दिवेकर, रोहित कांबळे या कलाकारांचा सहभाग आहे. ऑगस्ट महिन्याचे मानकरी म्हणून ज्येष्ठ अभिनेत्री जयश्री गडकर यांना संगीतमय आदरांजली वाहण्यात येणार आहे. शब्दांकन सुवर्णा गुराम यांचे आहे. पत्रकार, चित्रपट समिक्षक अनिल पोरेडी यांच्या स्मृतीदिनाचे निमित्त घेऊन ‘मला भावलेला चित्रपट’ ही स्पर्धा घेण्यात आली होती. त्याचा पारितोषिक वितरण सोहळा इथे होणार आहे. आजवर पद्मश्री वामन केंद्रे, शिवाजी साटम, अलका कुबल-आठल्ये, जयश्री खाडीलकर-पांडे, प्रेमानंद गज्वी, दिनकर गांगल, अशोक हांडे, गंगाराम गवाणकर, विसुभाऊ बापट, अरूण म्हात्रे, अनंत पणशीकर, रविंद्र आवटी, मधु खामकर, प्रदीप म्हापसेकर, गजल नवाज भीमराव पांचाळे यांचे अनमोल मार्गदर्शन लाभले आहे. कार्यक्रम विनामूल्य असल्याचे कला केंद्रच्या संचालिका नंदिनी नंदकुमार पाटील यांनी कळवले आहे.
