स्वामी स्वरुपानंद पतसंस्थेला ८ कोटी ३२ लाखांचा निव्वळ नफा

रत्नागिरी :  स्वामी स्वरुपानंद पतसंस्थेने सन २०२४-२५ या आर्थिक वर्षात १४.३४ टक्के व्यवसाय वृद्धी करत ८.३२ कोटींचा निव्वळ नफा, तर ९९.७१ टक्के इतकी विक्रमी कर्ज वसुली नोंदवली असल्याची माहिती पतसंस्थेचे अध्यक्ष अॅड दीपक पटवर्धन यांनी पत्रकार परिषदेत दिली.

याबाबत बोलताना ऍड पटवर्धन यांनी सांगितलं की, सन २०२४-२५ या आर्थिक वर्षात स्वामी स्वरुपानंद पतसंस्थेने कमालीचे सातत्य, प्रमाणबद्धता व विश्वासार्हता यांचा अर्थविष्कार करत आपल्या व्यवसायात १४.४३ टक्के वृद्धी नोंदवली. संस्थेच्या सर्वच शाखांमध्ये व्यवसाय वृद्धी झाली आहे. आपला विक्रमी वसुलीचा पायंडा अधिक मजबूत करत यावर्षीही सर्व कर्जदारांच्या उत्तम सहकार्यामुळे ९९.७ टक्के कर्ज वसुली केली असून संस्थेचा ग्रॉस एनपीए केवळ ०.६२टक्के तर नेट एनपीए शुन्य टक्के राखण्यात संस्था यशस्वी झाली आहे. सलग १७ वर्ष संस्थेने आपली वसुली ९९ टक्केचे वर राखत एनपीए तरतूद लागू झाल्यापासूनच संस्थेने नेट एनपीए शुन्य टक्के राखला असून संस्थेच्या ८ शाखांची वसुली १०० टक्के झाली असल्याची माहिती अॅड. पटवर्धन यांनी दिली.

या आर्थिक वर्षात १४.३४ टक्के व्यवसाय वृद्धी झाली. संस्थेचा सीडी रेशो ६३.६७टक्के इतका आदर्श प्रमाणात राहिला असून भांडवल पर्याप्तता अर्थात सीआरएआर २८.७०टक्के इतके भक्कम राहिले आहे. याचा अर्थ दीपक पटवर्धन संस्थेकडे जमा झालेला सर्व पैसा सर्वोत्तम विनियोगात आल्याने यावर्षी निव्वळ नफ्यात १८.३४ टक्के इतकी वाढ नोंदवत संस्थेने ८ कोटी ३२ लाखांचा निव्वळ नफा प्राप्त केला असल्याचेही अध्यक्षांनी सांगितले. सन २०२४-२५ या आर्थिक वर्षात संस्थेच्या ठेवीत १२.१४ टक्केने वाढ झाली असून संस्थेच्या ठेवी ३४६ कोटी २१ लाख झाल्या आहेत. संस्थेचे कर्ज वितरणात १७.२०टक्के वाढ झाली असून संस्थेचे कर्ज रू. २५२ कोटी ६४ लाख झाले असून हे कर्ज वितरण २३ हजार १९९ कर्ज खात्यांचे माध्यमातून करण्यात आले आहे. संस्थेने स्टॅटयूटरी गुंतवणूकही २५% प्रमाणात राखत रु.१०० कोटी २७ लाख एवढी गुंतवणूक केली असून संस्थेने आपले विविध कारणांसाठी निर्माण केलेल्या निधीपोटी रु.४८ कोटी ७३ लाख गुंतवणूक केली असून संस्थेची एकूण गुंतवणूक रुपये १४९ कोटी झाली आहे. संस्थेचा स्वनिधी रु. ४८.१३ लाख झाला असून संस्थेचा इमारत निधी रु.२२ कोटींचा झाला आहे.