अलिबाग: पनवेल महानगरपालिका जिल्हा रायगड सार्वत्रिक निवडणूक – ०१७ करिता २४ मे २०१७ रोजी मतदान होणार असल्यामुळे पनवेल महानगरपालिका क्षेत्रातील व पनवेल महानगरपालिका क्षेत्राबाहेर राहणाऱ्या पनवेल महानगरपालिकेच्या सर्व मतदारांना त्यांचा मतदानाचा हक्क बजावता यावा यासाठी महाराष्ट्र शासन, उद्योग व उर्जा व कामगार विभाग, महाराष्ट्र राज्य यांचेकडील शासन परिपत्रका नुसार दि. २४ मे २०१७ रोजी सार्वजनिक सुट्टी जाहिर करण्यात आलेली आहे.
याची सर्व शासकीय व खाजगी आस्थापना, दुकाने व इतर आस्थापना,निवासी हॉटेल्स, खाद्यगृहे, अन्नगृहे, नाट्यगृहे, व्यापार, औद्योगिक उपक्रम व इतर आस्थापना तसेच माहिती व तंत्रज्ञान कंपन्या, शॉपींग सेंटर, मॉल्स, रिटेलर्स इत्यादी आस्थापनांनी नोंद घ्यावी.
काही अपवादात्मक परिस्थितीत कामगार, अधिकारी, कर्मचारी इत्यादींना पूर्ण दिवस सुट्टी देणे शक्य नसेल तर मतदान क्षेत्रातील कामगारांना मतदानाचा हक्क बजावण्यासाठी सुट्टी ऐवजी केवळ २ ते ३ तासाची सवलत देता येईल मात्र त्याबाबत आस्थापनांनी पनवेल महानगरपालिका यांची पूर्व परवानगी घेणे आवश्यक राहील. कोणत्याही परिस्थितीत मतदारांना मतदानाचा हक्क बजावण्यासाठी २ ते ३ तासाची सवलत मिळेल याची दक्षता संबंधित आस्थापना मालकांनी घ्यावी.
तरी सर्व आस्थापना, कारखाने, दुकाने इत्यादींच्या मालकांनी, व्यवस्थापनांनी वरील सुचनांची काटेकोर अंमलबजावणी होईल याची खबरदारी घ्यावी, असे पनवेल महानगरपालिका आयुक्त, यांनी एका प्रसिद्धी पत्रकाद्वारे कळविले आहे.