रत्नागिरी, (प्रतिनिधी) : चित्रपटगृहांमध्ये बाहेरील खाद्यपदार्थ आत नेण्यावरून सध्या वादंग सुरु आहे. याबाबत अन्न व नागरी पुरवठा राज्यमंत्री रवींद्र चव्हाण यांना विचारलं असता, बाहेरील खाद्यपदार्थ चित्रपटगृहात नेण्यास कोणतीही बंदी नाही, हे पदार्थ तुम्ही गॅलरीत खाऊ शकता मात्र आत सिनेमागृहात खाद्यपदार्थ खाण्यास आणि विकण्यास बंदी असल्याचं चव्हाण यांनी स्पष्ट केलं. या मुद्यावरून काही पक्ष राजकारण करत आहेत, मात्र त्यांचे तोंड आपण पकडू शकत नाही अशा शब्दात रविंद्र चव्हाण यांनी मनसेचा उल्लेख न करता मनसेला फटकारलं आहे. ते आज रत्नागिरीत बोलत होते.
बाहेरील खाद्यपदार्थांवर बंदी घालण्याच्या निर्णय़ावरून उच्च न्यायालयाने मल्टिप्लेक्स असोसिएशनला कठोर शब्दात फटकारलं आहे. सिनेमा दाखवणं तुमचं काम आहे खाद्यपदार्थ विकणं नाही अशा शब्दात उच्च न्यायालायानं मल्टिप्लेक्स असोसिएशनला झापत राज्य सरकारच्या भुमिकेवर सुद्धा न्यायालयाने ताशेरे ओढले होते. या प्रकरणी जे अनेक वेळा आपण सांगत आलोत तेच परत सांगत असल्याचं सांगून मल्टिप्लेक्समध्ये खाद्यपदार्थ नेण्यास कुणी अडवू शकत नाही मात्र ते आत सिनेमागृहात खावू नये असा नियम आणि कायदा सांगतो. तसेच एमआरपी पेक्षा जास्त किमतीने पदार्थ विकले जात असतील तर त्यांच्यावर कारवाई होऊ शकते असं अन्न नागरी पुरवठा राज्यमंत्री रविंद्र चव्हाण यांनी सष्ट केलं.
Loading ...
