रत्नागिरी : दापोलीत डंपर व मॅक्सिमोमध्ये झालेल्या भीषण अपघात पाच जण जागीच ठार झाले. 2 जण गंभीर जखमी झाले आहेत. दापोली खेड मार्गावरील नारगोली येथे सकाळी साडेसातच्या सुमारास हा भीषण अपघात झाला. जखमींना अधिक उपचारासाठी मुंबईत हलविण्यात आलं आहे.
आज सकाळी संदीप शेलार मॅक्झिमो गाडी घेऊन चालले होते. त्यांची गाडी नारगोली येथील इंद्रधनू बागेजवळ आली असता समोरून येणाऱ्या डंपरला मॅक्झिमोची जोरदार धडक बसली. ओव्हरटेक करताना समोरून येणाऱ्या डंपरला ही धडक बसली असल्याचं म्हटलं जात आहे. ही धडक एवढी भीषण होती, की यामध्ये संदीप शेलार यांचा जागीच मृत्यू झाला. तर मधुकर कांबळे, जयदिश पारतुले व मदिया शेख, ठेमीदा शेख हेही जागीच ठार झाले. मधुकर कांबळे हे दापोली नगरपंचायतीचे कर्मचारी असून ते पाणी पुरवठा विभागात कार्यरत होते. तर गंभीर जखमी झालेले निलेश पवार व संदीप पावसकर यांना मुंबईत हलविण्यात आलं आहे. संदीप पावसकर हे आडेगावचे असून ते उपसरपंच आहेत.