मुंबई : मुरुड बंदरावर मच्छिमारांसाठी मासे उतरविण्यासाठी मुलभूत सुविधा पुरविणे व जेट्टीचे बांधकाम करण्याच्या प्रस्तावास प्रशासकीय मान्यता देण्यात आली असून, एप्रिल महिन्यापर्यंत काम पूर्ण करण्यात येईल. असे मत्स्यविकास मंत्री महादेव जानकर यांनी विधानसभेत सांगितले.
सदस्य सुभाष पाटील यांनी मुरुड बंदरावर मच्छिमार जेट्टी व कोल्ड स्टोरेज उपलब्धतेबाबत विचारलेल्या प्रश्नाला उत्तर देताना जानकर बोलत होते.
डहाणूला जेट्टीच्या मान्यतेचा परिपूर्ण प्रस्ताव प्राप्त झाल्यास त्यास मान्यता देण्यात येईल. या ठिकाणी भूभागाचे आरक्षण ज्या कारणांसाठी केले आहे, तोच प्रकल्प पूर्ण करण्यात येईल. बर्फ कारखान्यासाठी आरक्षित जागेवर बर्फ कारखानाच तयार होईल. बर्फ साठवणुकीचा प्रस्ताव आल्यास त्यालाही मान्यता देण्यात येईल. ससून डॉक सुशोभीकरण, मच्छिमारांच्या सुविधा अशा विविध कामासाठी केंद्र व राज्य सरकारने निधी दिला असून, तातडीने काम पूर्णत्वास आणण्यात येतील, असेही जानकर यांनी सांगितले.
