मुंबई : शैक्षणिक अभ्यासक्रमाचा आराखडा, नवीन विद्यापीठ कायद्यातील सुधारणा, ॲप्रेंटिशीप कायद्यातील बदलामुळे रोजगाराच्या उपलब्ध होणाऱ्या संधी अशा विविध विषयावर राज्याचे मुख्यमंत्री देवेंद्र फडणवीस विद्यार्थ्यांनी विचारलेल्या प्रश्नांना स्पष्ट, निर्भिड आणि प्रामाणिक उत्तरे देणार आहेत.
‘मी मुख्यमंत्री बोलतोय’ कार्यक्रमाचा पहिला भाग रविवारी म्हणजेच दिनांक २१ मे रोजी प्रसारित झाला होता. आता याच कार्यक्रमाचा दुसरा भाग येत्या रविवारी म्हणजेच २८ मे रोजी सकाळी १० वाजता झी २४ तास या वाहिनीवर, सकाळी १०: ३० वाजता झी मराठी आणि सह्याद्री वाहिनीवर तर साम मराठी या वाहिनीवर सकाळी ११ ला प्रक्षेपित होणार आहे. सह्याद्री दूरदर्शनवर या कार्यक्रमाचे पुन:प्रसारण सोमवारी २९ मे रोजी संध्याकाळी ५.३० वाजता होणार आहे. आकाशवाणीवरून प्रसारित होणाऱ्या दिलखुलास या कार्यक्रमातही ‘मी मुख्यमंत्री बोलतोय’ कार्यक्रमाचे प्रसारण होणार आहे. सोमवार आणि मंगळवार म्हणजेच दिनांक २९ मे आणि ३० मे असे दोन दिवस सकाळी ७.२५ ते ७.४० या वेळेत आकाशवाणीच्या सर्व केंद्रावर हा कार्यक्रम प्रसारित होणार आहे.
कार्यक्रमाच्या पहिल्या भागात मुख्यमंत्री देवेंद्र फडणवीस यांनी विद्यार्थ्यांसाठी शालेय व महाविद्यालयीन शिक्षण क्षेत्रातील सुधारणा या विषयाच्या अनुषंगाने विद्यार्थ्यांशी संवाद साधला. तर दुसऱ्या भागात शिक्षण व्यवस्थेतील वेगवेगळे प्रश्न, शिक्षण पद्धतीतले १०+२+३ हे असलेले सूत्र, आगामी काळात शिक्षणामध्ये होणारे बदल याबाबत विद्यार्थ्यांनी विचारलेल्या प्रश्नांना मुख्यमंत्री देवेंद्र फडणवीस यांनी उत्तरे दिली आहेत.
माहिती व जनसंपर्क महासंचालनालयामार्फत निर्मित ‘मी मुख्यमंत्री बोलतोय’ या कार्यक्रमाच्या मालिकेत विषय निवडून त्या विषयाशी संबंधित निमंत्रिताशी मुख्यमंत्री देवेंद्र फडणवीस संवाद साधतात. दर महिन्याला या कार्यक्रमाचे ध्वनीचित्रमुद्रण करून दोन भागात प्रसारित करण्यात येते.
