जालना : माहिती व जनसंपर्क महासंचालनालयाच्या लोकराज्य मासिकाच्या ऑगस्ट महिन्याच्या वारी विशेषांकाचे विमोचन जिल्हाधिकारी रवींद्र बिनवडे यांच्या हस्ते जिल्हाधिकारी कार्यालयात करण्यात आले. यावेळी जिल्हा पोलीस अधीक्षक रामनाथ पोकळे, जिल्हा माहिती कार्यालयातील दूरमुद्रक चालक राजेंद्र वाणी यांची उपस्थिती होती.यावेळी जिल्हाधिकारी श्री.बिनवडे यांनी लोकराज्यच्या वारी विशेषांकाचे कौतुक करत लोकराज्यचा अंक हा वाचनीय असतो. तो प्रत्येकाने वाचावा, असे आवाहनही यावेळी केले.पंढरपूरची आषाढी वारी ही महाराष्ट्राच्या सांस्कृतिक आणि सामाजिक वैभवाचा सर्वश्रेष्ठ आविष्कार आहे. यंदाच्या वारीत माहिती आणि जनसंपर्क महासंचालनालयामार्फत ‘संवादवारी’ हा विशेष उपक्रम राबविण्यात येत आहे. या माध्यमातून शासनाच्या विविध लोकोपयोगी योजना वारकऱ्यांपर्यंत पोहोचविण्यात येत आहेत. या विशेषांकाचे अतिथी संपादक असलेल्या महसूल मंत्री श्री.पाटील यांनी ‘रंगले हे चित्त माझे विठुपायी’ असे म्हणत वारकऱ्यांसाठी संदेश दिला आहे. अंकामध्ये मान्यवरांनी वारीच्या विविध अनुषंगाने विचार मांडले आहेत. विठ्ठल-रुक्मिसणी मंदिर समितीचे अध्यक्ष अतुल भोसले यांनी समितीमार्फत भक्तांसाठी दिल्या जाणाऱ्या सोयी सुविधांची माहिती दिली आहे. पुणे विभागीय आयुक्त डॉ. दीपक म्हैसेकर आणि सोलापूर जिल्हाधिकारी डॉ. राजेंद्र भोसले यांनी पालखी मार्गावर तसेच पंढरपूर येथे प्रशासनामार्फत करण्यात आलेल्या सोयी सुविधा तसेच उपाय योजनांची माहिती दिली आहे. राज्य शासनामार्फत आयोजित केल्या जाणाऱ्या स्वच्छतेच्या वारीसंदर्भातही विशेषांकात माहिती आहे.हा लोकराज्यचा विशेषांक जालना जिल्ह्यातील विविध विक्रेत्यांकडे विक्रीसाठी उपलब्ध आहे. या अंकाची किंमत रू.10 इतकी असून लोकराज्य (मराठी) मासिकाची वार्षिक वर्गणी 100 रूपये इतकी असून ही वर्गणी जिल्हा माहिती कार्यालय, प्रशासकीय इमारत, तळ मजला, जालना येथे भरता येईल. जिल्ह्यातील जास्तीत जास्त नागरिकांनी हा विशेषांक संग्रही ठेवावा, असे आवाहन जिल्हा माहिती कार्यालयाच्यावतीने करण्यात येत आहे.
