डोंबिवली : नैसर्गिक आपत्ती ओढवलेल्या केरळ राज्यातील आपत्तीग्रस्त नागरिकांसाठी अनेक राज्ये तसेच परदेशातूनही मदतीचे हात धावून आले. परंतु विशेष बाब म्हणजे डोंबिवलीतील चार वर्षीय रुद्रा मेनन हिने आपल्या वाढदिवसादिनी दोन वर्षांपासून जमलेल्या खाऊच्या मनीबँकेतील संपूर्ण रक्कम केरळमधील पूरग्रस्तांसाठी शाळेच्या मुख्याध्यापिकांकडे सुपूर्द केली. रुद्राची बाल वयातील समाजसेवा पाहून शाळेच्या मुख्याध्यापिका आणि शिक्षकांनी तिचे कौतुक केले.
पूर्वेकडील पांडुरंगवाडीतील मॉडेल शाळेत शिकणारी 4 वर्षाची रुदा मेनन हिने तिच्या वाढदिवसादिनी मनीबँकेतून 4, 557 रुपये आपल्या केरळ पूरग्रस्तांना मदत म्हणून दिले. शाळेच्या मुख्याध्यापिका लाली पिल्लई यांच्याकडे हे पैसे देत असताना तिच्या सोबत तिचे आजोबा वासूदेवन मेनन आणि तिची आई रागी मेनन उपस्थित होते. लहानगीने केलेली मदत खरच कौतुकास्पद असून तिची मदत आमची शाळा कधीही विसरू शकत नाही. केरळ येथील एका ट्रस्टकडे ही रक्कम दिली जाणार असून तिची मदत केरळ पूरग्रस्तांसाठी छोटी का होईना पण महत्वाची आहे. तिचे आजोबा वासूदेव मेनन, आजी पुष्पा मेनन, वडील राकेश आणि आई रागी यांनी तिच्यावर केलेल्या संस्कारामुळे आज ही विशेषबाब समोर येत आहे. ही लहानगी भविष्यात मोठी झाल्यावर समाजासाठी एक आदर्श ठरेल असे शाळेच्या मुख्याध्यापिका लाली पिल्लई यांनी यावेळी सांगितले. रुद्राने तिचा पहिला वाढदिवस कल्याण पूर्वेकडील नवज्योत वृद्धाश्रमात तर दुसरा वाढदिवस उल्हासनगर येथील बालगृहात साजरा केला होता. तिसऱ्या वाढदिवस रुद्राने भिवंडी येथील एस.बी.बालाश्रम येथील बच्चेकंपनीबरोबर साजरा केला. आपल्या नातीचा वाढदिवस हा समाजाला एक आदर्श ठरावे आणि आपल्या हातून जेवढी मदत होईल तेवढी मदत करू असे रुद्राचे आजोबा वासूदेव मेनन यांनी सांगितले.