मुंबई : राष्ट्रीय कुष्ठरोग निर्मूलन कार्यक्रमांतर्गत आजपासून ९ ऑक्टोबर २०१८ पर्यंत राज्यातील ३५ जिल्ह्यांत व ३५५ तालुक्यांमध्ये कुष्ठरोग शोध अभियान राबविण्यात येत आहे. ७१ हजार २९७ शोधपथकांच्या सहाय्याने १४ दिवसात सुमारे साडेआठ कोटी लोकांची तपासणी करण्यात येणार आहे, अशी माहिती आरोग्यमंत्री डॉ. दीपक सावंत यांनी आज येथे दिली.या अभियानाबाबत अधिक माहिती देताना आरोग्यमंत्री डॉ. सावंत यांनी सांगितले, २०१७-१८ मध्ये कुष्ठरोगाचे प्रमाण दर दहा हजारी ०.८० पेक्षा जास्त असलेल्या २२ जिल्ह्यांमध्ये शोध मोहीम राबविण्यात आली. प्रत्येक गावातील स्थानिक ‘आशा’ कार्यकर्ती व एक पुरुष स्वयंसेवक यांचे पथक तयार करुन ४ कोटी ५९लाख २९ हजार ६६१ लोकांची प्रत्यक्ष तपासणी केली. त्यामध्ये १ लाख ६४ हजार ९६४ संशयित रुग्ण शोधण्यात आले व त्यांच्यावर बहुविध उपचार सुरु करण्यात आले.
२०१६-१७ मध्ये १६ जिल्ह्यांमध्ये ही मोहीम राबविण्यात आली त्यात ४१३४ नवीन कुष्ठरुग्ण शोधण्यात आले व त्यांना बहुविध उपचार देऊन रोगमुक्त करण्यात आले. २०१५-१६ मध्येही पाच जिल्ह्यात शोध मोहीम राबवून १६६ रुग्णांवर उपचार करण्यात आले. प्रधानमंत्री नरेंद्र मोदी यांनी कुष्ठरोग निर्मूलन कार्यक्रमाचा प्रगती योजनेत समावेश केला आहे. त्या अनुषंगाने देशात विविध मोहिमा राबवून कुष्ठरूग्ण शोधून त्यांच्यावर बहुविध औषधोपचार करून त्यांना रोगमुक्त केले जात आहे. समाजात लपून राहिलेले कुष्ठरुग्ण शोधून काढून उपचाराखाली आणण्यासाठी हे अभियान राबविण्यात येत असल्याचे आरोग्यमंत्र्यांनी सांगितले.यावर्षी या मोहिमेंतर्गत ३५ जिल्ह्यांची निवड करण्यात आली असून कुष्ठरुग्ण शोधण्यात येणार आहेत.
अशी आहे शोध मोहीम
एकूण अपेक्षित लोकसंख्या – ८ कोटी ६२ लाख ६५ हजार ४३७
· तालुक्यांची संख्या -३५५
· एकूण घरांची संख्या- १ कोटी ७२लाख ५३ हजार ०८७
· एकूण आवश्यक शोधपथक ( टिम ) संख्या – ७१ हजार २९७
· सर्वेक्षण कालावधी – १४ दिवस ( २४ सप्टेंबर ते ०९ ऑक्टोबर २०१८)
· शोध पथकात स्त्रियांची तपासणी करण्याकरिता एक ‘आशा’कार्यकर्ती व पुरुषांची तपासणी करण्याकरिता एका स्वयंसेवकांचा समावेश असेल.
· घरातील प्रत्येकांची शारीरीक तपासणी करण्यात येणार आहे.
· शोधण्यात आलेल्या प्रत्येक संशयिताची वैद्यकीय अधिकाऱ्यांकडून तपासणी करुन रोगनिदान करण्यात येणार आहे.