रत्नागिरी, 16 June : कोकण रेल्वेच्या एका कर्मचाऱ्याचा कोरोनाने मुंबई येथे दोन दिवसांपूर्वी मृत्यू झाल्यानंतर एकच खळबळ उडाली आहे. या कर्मचाऱ्याच्या संपर्कात आलेल्या 52 कर्मचाऱ्यांची यादी रेल्वे प्रशासनाने आरोग्य विभागाला दिली, त्यातील काही जणांचे स्वॅब टेस्टसाठी ताब्यात घेतले होते. यातल्या जवळपास 29 कर्मचाऱ्यांना क्वारंटाईन करण्यात आलं आहे.
कोकण रेल्वेच्या रोहा – कोलाड दरम्यानच्या मार्गावर सिग्नल व टेलिकम्युनिकेशन विभागात हा कर्मचारी काम करत होता. दोन दिवसांपूर्वी त्याचा कोरोनाने मृत्यू झाल्याचे स्पष्ट झाले आहे. हा कर्मचारी 9 जून रोजी रोहा ते कोलाड दरम्यान कोकण रेल्वेच्या सेवेत कार्यरत होता. त्याचवेळी रत्नागिरातील 2 ते 3 कर्मचारी तेथे कार्यरत होते. हे कर्मचारी कोरोनाग्रस्ताच्या संपर्कात आले होते. मात्र कोरोनामुळे त्याचा 13 जून रोजी मृत्यू झाल्याने कर्मचाऱ्यांमध्ये प्रचंड खळबळ उडाली आहे. त्याच्या संपर्कातील बेलापूर व कोलाडमधील कर्मचाऱ्यांचे स्वब तपासणीसाठी पाठवण्यात आले आहेत. त्यापाठोपाठ कोकण रेल्वे प्रशासनाकडून दक्षता घेत त्या व्यक्तीच्या संपर्कात आलेल्या रत्नागिरीतील काही कर्मचाऱ्यांची यादी तयार करण्यात आली आहे. त्यांची कोरोना चाचणी करण्याच्या सूचना कोकण रेल्वे प्रशासनस्तरावरून करण्यात आल्या आहेत. कोकण रेल्वे प्रशासनाने तब्बल 52 जणांची यादी तयार करुन ती आरोग्य विभागाला दिली असून यातल्या 29 जणांचे कोरोना तपासणीसाठीचे स्वॅब घेऊन या सर्वांना क्वारंटाईन करण्यात आले.
