मुंबई,22, June : भायखळा पूर्व परिसरात केंद्र शासनाच्या अखत्यारीतील ‘रीचर्डसन आणि क्रुडास’ कंपनीच्या परिसरात तात्पुरत्या स्वरूपातील एक मोठे उपचार केंद्र उभारण्यात आले असून या केंद्राचे लोकार्पण राज्याचे वस्त्रोद्योग, मत्स्यव्यवसाय, बंदरे व मुंबई शहराचे पालकमंत्री अस्लम शेख व मुंबईच्या महापौर किशोरी किशोर पेडणेकर यांच्या हस्ते सोमवार दिनांक 22 जून, रोजी सायंकाळी पार पडले.
याप्रसंगी स्थानिक खासदार अरविंद सावंत, स्थानिक आमदार यामिनी जाधव, आमदार अमिन पटेल, आरोग्य समिती अध्यक्ष अमेय घोले , अतिरिक्त महापालिका आयुक्त (शहर) संजीव जयस्वाल, ‘परिमंडळ 1’चे उपायुक्त हर्षद काळे,’इ’ विभागाचे सहाय्यक आयुक्त मकरंद दगडखैर उपस्थित होते.
‘कोविड 19’ बाधित रुग्णांवर अधिक प्रभावीपणे उपचार करता यावेत, यासाठी महापालिका क्षेत्रातील काही ठिकाणी ‘जंबो फॅसिलिटी’ अर्थात अधिक क्षमतेची उपचार केंद्रे रुग्ण सेवेत रुजू झाली आहे. त्यानुसारच आता भायखळा पूर्व येथे तब्बल 1 हजार खाटांची क्षमता असलेल्या उपचार केंद्राची उभारणी करण्यात आली आहे.
‘कोविड 19’ बाधित रुग्णांवर उपचार करताना शरीरातील प्राणवायूच्या पातळीची अर्थात ‘ऑक्सिजन लेव्हल’ची महत्त्वाची भूमिका असते. ही बाब लक्षात घेऊन याठिकाणी असणाऱ्या हजार खाटांपैकी 300 खाटा या ‘ऑक्सीजन बेड’ असणार असल्याचे वस्त्रोद्योगमंत्री असलम शेख यांनी प्रसारमाध्यम प्रतिनिधीशी बोलताना सांगितले .
महापौर किशोरी पेडणेकर प्रसारमाध्यम प्रतिनिधी संवाद साधताना म्हणाल्या की, या ठिकाणी अद्ययावत सोयी सुविधा उपलब्ध करून देण्यात आल्या असून यासोबतच या ठिकाणी 50 डॉक्टर्स, 100 नर्सेस आणि 150 परिचर व इतर वैद्यकीय कर्मचारी असे एकूण 300 कर्मचारी दिवसाचे 24 तास अव्याहतपणे कार्यरत असणार असल्याचे महापौरांनी सांगितले. याव्यतिरिक्त आवश्यकतेनुसार रुग्णवाहिका व रुग्णसेवेसाठी आवश्यक असणाऱ्या इतर बाबी देखील गरजेनुरूप उपलब्ध करून घेतल्या जाणार असल्याचे महापौरांनी यावेळी स्पष्ट केले.
या उपचार केंद्राच्या उभारणीच्या अनुषंगाने वैद्यकीय विषयक बाबींचे नियोजन करण्याची जबाबदारी ‘परिमंडळ 1’ चे सहाय्यक आरोग्य अधिकारी डॉक्टर प्रमोद आष्टेकर आणि ‘इ’ विभागाच्या वैद्यकीय आरोग्य अधिकारी डॉक्टर निपा मेहता यांनी सांभाळली आहे.
तब्बल 11 हजार खाटांचे हे तात्पुरत्या स्वरूपातील उपचार केंद्र उभारण्यास दिनांक 10 जून , रोजी सुरुवात झाली. त्यानंतर अक्षरश: दिवस-रात्र पद्धतीने उपचार केंद्राची उभारणी करण्यासाठी महापालिकेचे अनेक अभियंते – कामगार – कर्मचारी या ठिकाणी रात्रंदिवस राबले आहेत.
पालिकेच्या अभियंत्यांनी विविध अडचणींवर मात करत हे उपचार केंद्र उभारण्याच्या कामात कोणताही खंड पडू दिला नाही. यामध्ये प्रामुख्याने पालिकेच्या ‘इ’ विभागातील परिरक्षण खात्यातील सहाय्यक अभियंता अक्षय जगताप, दुय्यम अभियंता पूजा तावडे यांच्यासह सर्व संबंधित कामगार – कर्मचारी अभियंत्यांच्या समावेश आहे.
