जिल्हा रुग्णालयात कोरोना संशयित रुग्णांचा धिंगाणा, कोरोनाबाधीत माहिलेची आरोग्य कर्मचाऱ्याला धमकी

साखरतर येथील कोरोनाबाधित महिला रूग्णाच्या नातेवाईकांना जिल्हा रूग्णालयात क्वारंटाईन करून ठेवण्यात आले आहे. यांचे रिपोर्ट हे गुरूवारी रात्री आले. यातील एका महिलेचा रिपोर्ट पॉझिटिव्ह आला होता. या कोरोनाबाधित महिला रूग्णाला  वेगळ्या वॉर्डमध्ये शिफ्ट करावे लागेल अशी माहिती संबंधित रूग्णाच्या नातेवाईकांना आरोग्य कर्मचाऱ्यांनी दिली. यावेळी या संशियत रुग्णांनी व कोरोना पॉझिटिव्ह आलेल्या महिला रुग्णाने हंगामा केला. तुम्ही हे रिपोर्ट खोटे बनवून आणले असल्याचा आरोप करत कर्मचाऱ्याच्या अंगावर धावून गेले.. आम्ही तुम्हाला बघून घेऊ. उद्या सकाळी तुम्ही सगळे कुठे असाल हे तुम्हाला कळणार नाही अशी धमकी कोरोनाबाधितच्या नातेवाईकांनी दिल्याचा आरोप जिल्हा रूग्णालयातील आरोग्य कर्मचाऱ्यांनी केला आहे. तसेच एका नातेवाईकाने भिंतीवरील ट्युबलाईट काढून अंगावर धावून आला, अशी माहिती कर्मचाऱ्याने दिली आहे. हे सर्व प्रकरण आम्ही जिल्हा शल्य चिकित्सकांना फोनवरून सांगितलं, त्यांनीही फोन वरून सूचना केल्या. मात्र कोणी अधिकारी इथं आला नाही अशी तक्रार या कर्मचाऱ्यांची आहे. त्यामुळे आमच्या सुरक्षेचे काय? असा सवाल आरोग्य कर्मचाऱ्यांनी केला आहे. दरम्यान जिल्हा रुग्णालयातील कर्मचाऱ्यांनी  जिल्हाधिकारी यांची भेट घेऊन आपली कैफियत त्यांच्यासमोर मांडली आहे.