हेदवीच्या प्रसिद्ध बामणघळीत पडून ठाणेतील पती-पत्नीचा मृत्यू

रत्नागिरी, विशेष प्रतिनिधी :- गुहागर तालुक्यातील निसर्गरम्य अशा हेदवी समुद्रकिनारी असलेल्या बामणघळ मध्ये पर्यटक पती-पत्नीचा बुडून मृत्यू झाल्याची दुर्दैवी घटना शनिवारी घडली.

निसर्गरम्य म्हणून प्रसिद्ध असलेल्या गुहागर तालुक्यातील हेदवी-बामणघळ हे ठिकाण प्रसिद्ध आहे. त्यामुळे येथे मोठ्या प्रमाणात पर्यटकांची रेलचेल असते. याच वेळेला समुद्रकिनारी असणाऱ्या बामणघळावरील लाटेशी मौजमजा करत असताना ठाणे येथील पती-पत्नी सेल्फी काढत होते. याचवेळी आलेल्या समुद्राच्या लाटे बरोबर पत्नीचा तोल बामणघलीत गेला आणि पत्नी पडताना पाहून पतीने तिला वाचविण्याचा प्रयत्न केला असता स्वतः त्याचा तोल गेला. अशाप्रकारे या  दोघांचा  बामणघळीत पडून दुर्दैवी मृत्यू झाल्याची घटना घडली. अनंत माणगावकर (वय 36) सूचना माणगावकर (वय 33 रा. ठाणे) अशी पती-पत्नीची नावे आहेत.

घटनेची माहिती समजताच पोलीस पाटील, स्थानिक तरुण आणि गुहागरचे पोलिस दाखल झाले होते. दरम्यान या दोघांचे मृतदेह काढण्यात आले.  नववर्षाच्या प्रारंभीच हेदवी समुद्र किनारी या पती-पत्नी पर्यटकांचा असा दुर्दैवी मृत्यू झाल्याने फिरायला आलेल्या अनेक पर्यटकांच्या आनंदावर विरजण पडले आहे.