रत्नागिरी, 24 मे : दापोली तालुक्यातील हर्णे नवानगर समुद्रकिनारी पुन्हा एक मृत डॉल्फिन मासा ग्रामस्थांच्या निदर्शनास आला. दोन ते तीन दिवसांपूर्वीच हा डॉल्फिन किनाऱ्याला लागला असल्याचे ग्रामस्थांचं म्हणणं आहे. सदरचा डॉल्फिन कुजलेल्या अवस्थेत होता. त्यामुळे आज घटनास्थळी वनविभागाच्या कर्मचाऱ्यांनी हजर राहून पंचनामा करून ताबडतोब ग्रामस्थांच्या मदतीने तिथेच पुळणीत खड्डा काढून पुरला.
दापोली तालुक्यात दोन महिन्यात डॉल्फिन मासा मृत अवस्थेत सापडण्याचा तिसऱ्यांदा हा प्रकार घडला आहे. वारंवार हे डॉल्फिन माशांच्या बाबतीत होत असल्यामुळे निसर्गप्रेमींमधून चिंता व्यक्त होत आहे.
दापोली तालुक्यातील सालदुरे,पाळंदे येथे समुद्र किनारी गेल्या काही दिवसांपूर्वी एक मृत डॉल्फिन सापडला होता. त्यानंतर ३ मे रोजी दुसऱ्या एका डॉल्फिनचा मृतदेह समुद्रातून वाहून येऊन किनार्‍याला पडलेला आढळून आला. एकाच आठवड्यात दोन डॉल्फिनचा एका समुद्रकिनारी मृत्यू ओढवल्याने अनेक तर्क वितर्क लढवले जात होते. काही दिवसांपूर्वी गुहागर येथील समुद्र किनारी देखील मृत डॉल्फिन सापडला होता.
त्यानंतर आता पुन्हा एकदा हर्णे नवानगर येथे मृत अवस्थेत डॉल्फिन सापडला. दापोली तालुक्यातली या दोन महिन्यातली मृत डॉल्फिन किनाऱ्यावर सापडण्याची ही तिसरी घटना आहे. मात्र हे डॉल्फिन नेमके कोणत्या कारणाने मृत होत आहेत, याचा शोध लावून डॉल्फिन मृत होण्याचे कारण समोर येणं आवश्यक आहे.
