
मालाड, (निसार अली) : ज्येष्ठ मच्छिमार नेते रामचंद्र काना पाटील तथा रामभाऊ पाटील यांचे आज रात्री वयाच्या 79 व्या वर्षी मुंबईत निधन झाले. ते वर्ल्ड फिश फोरम चे माजी सदस्य, नॅशनल फिश वर्कर्स फोरम, महाराष्ट्र मच्छिमार कृती समितीचे माजी अध्यक्ष होते.
त्यांच्या पश्चात पत्नी, मुले जिवीतेश आणि प्रशांत, मुलगी वंदना व दोन नातवंडे असा परिवार आहे.
गेले 4 वर्षे ते मूत्रपिंडाच्या विकाराने आजारी होते. त्यांची तब्येत बिघडल्याने त्यांना अंधेरी पश्चिम येथील बीएसईएस रुग्णालयात दाखल करण्यात आले होते. उपचारादरम्यान आज रात्री 8 वाजून 48 मिनिटांनी त्यांची प्राणज्योत मालवली. उद्या दुपारी सोमवारी त्यांच्या जन्मगावी वडराई-माहीम, जिल्हा पालघर येथे अंत्यसंस्कार करण्यात येणार आहेत, अशी माहिती महाराष्ट्र मच्छिमार कृती समितीचे सरचिटणीस किरण कोळी यांनी दिली. राष्ट्र सेवादलातून त्यांनी समाजकार्यास सुरुवात केली. वडराई मच्छिमार संस्थेचे अध्यक्ष, सरपंच तसेच वर्ल्ड फिश फोरम पिपल संघटनेवर आशियाई खंडाचे प्रतिनिधी म्हणूनही त्यांनी काम पाहिले होते.