
ठाणे : मुंबई क्रिकेट संघटनेचे सुवर्णपदक विजेते क्रिकेट अंपायर डॉक्टर प्रकाश वझे यांचे ठाणे येथे ट्रक अपघातात निधन झाले. ठाण्यातील आनंदनगर चेक नाका परिसरात झालेल्या या अपघातात ट्रकने दिलेल्या धडकेत डॉक्टर वझे यांचा जागीच मृत्यू झाला तर त्यांच्यासोबत असलेला त्यांचा सहाय्यक नागप्पा हेडगे गंभीर जखमी झाला. रस्त्यावर असलेला खड्डा चुकवताना वझे यांना मागून येणाऱ्या ट्रकने जोरदार धडक दिली. हेडगे याच्यावर रुग्णालयात उपचार सुरु आहेत.
सुवर्णपदक विजेते असलेल्या वझे यांनी मुंबई क्रिकेट संघटनेच्या अनेक प्रथम श्रेणी सामन्यामध्ये अंपायर म्हणून काम पहिले होते. अपायरिंग करत असतांना त्यांनी अनेक वर्षे नवोदितांसाठी मोफत क्रिकेट अंपायर प्रशिक्षण शिबीरे आयोजित केली होती. स्वताच्या नावाने स्थापन केलेल्या डॉक्टर प्रकाश वझे क्रीडा प्रतिष्ठानच्या माध्यमातून त्यांनी वैद्यकीय व्यावसायिकांसाठी टेनिस, डबल विकेट क्रिकेट,
बॅडमिंटनच्या राज्यस्तरीय स्पर्धा आयोजित केल्या होत्या. याशिवाय स्थानिक पातळीपासून फिडे रेटिंग बुध्दिबळ स्पर्धा आयोजित करून डॉक्टर वझे यांनी मुंबई, ठाणे, रायगड, पालघर जिल्ह्यातील उदयोन्मुख बुध्दिबळपटूना व्यासपीठ उपलब्ध करून दिले होते.