मुंबई : धनगर समाजाला अनुसूचित जमातीमध्ये आरक्षण देण्यासंदर्भात हिवाळी अधिवेशनात निर्णय होण्याची शक्यता आहे. या समाजाच्या आरक्षणासंदर्भात अभ्यास आणि सर्वेक्षण सुरू आहे. आज याबाबत खासदार डॉ. विकास महात्मे यांच्या नेतृत्त्वाखाली विविध संघटनांच्या प्रतिनिधींनी मुख्यमंत्री देवेंद्र फडणवीस यांची भेट घेतली. यावेळी आरक्षणासंदर्भात टाटा समाज विज्ञान संस्थेने केलेल्या अभ्यासाच्या प्रगतीचा आढावा घेण्यात आला आणि हा अभ्यास अहवाल टाटा समाज विज्ञान संस्थेने येत्या नोव्हेंबरपर्यंत सरकारकडे पाठवावा, असे निर्देश मुख्यमंत्र्यांनी यावेळी दिले.
मुख्यमंत्री म्हणाले की, धनगर समाजाला अनुसुचित जमातीमध्ये आरक्षण देण्यासंदर्भात विविध पुरावे गोळा करून सखोल अहवाल करण्यासाठी टाटा समाज विज्ञान संस्थेने काम सुरू केले आहे. या सर्वेक्षण व इतर अभ्यासातून तयार झालेला अहवाल राज्य सरकारकडे हिवाळी अधिवेशनाच्या पूर्वी नोव्हेंबरपर्यंत देण्यात यावा. त्यानंतर सरकार पुढील कार्यवाही करेल.
यावेळी प्रा. धारोवार यांनी आतापर्यंत संस्थेने केलेल्या अभ्यासाचा व सर्वेक्षणाचा आढावा सादर केला. डॉ. महात्मे यांनी या अभ्यासावर समाधान व्यक्त करून अहवाल तातडीने देण्याची विनंती केली.
आदिवासी विकास विभागाच्या प्रधान सचिव मनिषा वर्मा, आदिवासी संशोधन व प्रशिक्षण संस्थेचे आयुक्त नरेंद्र पोयाम, टाटा समाज विज्ञान संस्थेतील सहयोगी प्राध्यापक शैलेंद्रकुमार धारोवार आदी यावेळी उपस्थित होते.
