मुंबई – काँग्रेसचे नेते राहुल गांधी यांनी आता काँग्रेसच्या मूळ विचारांना दूर सारले असून ते पूर्णपणे अर्बन नक्षलवाद्यांच्या आणि अराजकतावाद्यांच्या प्रभावाखाली आहेत, अशी जोरदार टीका महाराष्ट्राचे उपमुख्यमंत्री देवेंद्र फडणवीस यांनी केली. एका मुलाखतीत फडणवीस यांनी राहुल गांधींवर हल्लाबोल करताना त्यांच्यावर गंभीर आरोप केले.
फडणवीस म्हणाले की, राहुल गांधी अनेक प्रसंगी भारतीय संविधानाची प्रत उंचावून दाखवतात, मात्र त्या प्रतेला निळ्या रंगाऐवजी लाल रंगाचे कव्हर लावलेले असते. त्यांच्या मते, हा लाल रंग अराजकतेचे प्रतीक आहे. “राहुल गांधी संविधानाचा आग्रह धरतात, मात्र त्यांच्या आजूबाजूला अराजकता आणि अर्बन नक्षलवादी घेरून बसलेले आहेत,” असे फडणवीसांनी सांगितले. यासोबतच, त्यांनी राहुल गांधींवर भारत जोडो यात्रेत सहभागी झालेल्या १८० संघटनांचा उल्लेख केला, ज्यांना विध्वंसक मानले जाते. “भारत जोडोच्या नावाखाली त्यांनी अराजकतावादी संघटनांना एकत्रित केले आहे, जे नोंदवलेल्या पुराव्यांमध्ये आहे,” असे फडणवीस म्हणाले.
फडणवीसांनी नागपूरमध्ये होत असलेल्या ओबीसी सन्मान संमेलनात पत्रकारांना प्रवेश नाकारल्याबद्दल देखील टीका केली. “राहुल गांधी संविधानाचा आदर राखण्याची गोष्ट करतात, पण पत्रकारांना बाहेर ठेवून लोकशाहीच्या चौथ्या स्तंभाची गळचेपी केली आहे,” असे त्यांनी स्पष्ट केले. फडणवीसांच्या मते, ही कृती गांधींच्या लोकशाहीच्या दाव्याशी विसंगत आहे आणि त्यांच्या पारदर्शकतेविषयी प्रश्न निर्माण करते.
लोकसभा निवडणुकीत काँग्रेसने पसरवलेल्या “भाजप संविधान बदलणार” या नरेटिव्हबद्दल विचारले असता, फडणवीस म्हणाले की, “पंतप्रधान नरेंद्र मोदींनी स्पष्ट केले आहे की संविधानाला धक्का पोहोचणार नाही.” राहुल गांधी अमेरिकेत बोलले होते की कालांतराने आरक्षण समाप्त होऊ शकते, आणि या विधानाला महाराष्ट्र काँग्रेस प्रदेशाध्यक्ष नाना पटोले यांनी देखील समर्थन दिले होते. त्याशिवाय, फडणवीसांनी व्होट जिहादच्या मुद्द्यावरही भाष्य केले. त्यांच्या मते, अल्पसंख्यांक मतदारांची दिशाभूल केली गेली आणि भाजपविरोधात मतदान करण्यास भाग पाडले गेले, ज्यामुळे भाजपाला दहा लोकसभा मतदारसंघांवर परिणाम झाला.
फडणवीसांच्या मते, काँग्रेसच्या या दुटप्पीपणामुळे अल्पसंख्यांक मतदारांचीही फसवणूक झाली आहे. ते म्हणाले, “अल्पसंख्यकांना आता कळले आहे की काँग्रेसने त्यांची फसवणूक केली.” या टीकांमधून फडणवीसांनी राहुल गांधी आणि काँग्रेसवर जोरदार हल्ला चढवत महाराष्ट्रातील निवडणुकीच्या पार्श्वभूमीवर भाजपची भूमिका अधिक ठळक केली आहे.
