बायोमॅट्रीक हजेरी नगरसेवकांनाही बंधनकारक

मुंबई – पालिका सभागृहाच्या बाहेर ठेवण्यात येणाऱ्या हजेरी बूकावर सही करुन पळ काढणाऱ्या नगरसेवकांना आता बायोमॅट्रीक हजेरी बंधनकारक करण्यात आली आहे. तसेच सीसीटीव्ही यंत्रणेद्वारे नजर ठेवली जाणार आहे. महापौर व उपमहापौर यांना या निर्णयातून वगळण्यात आले आहे. पालिका प्रशासनाने याबाबतचा निर्णय घेतल्याने नगरसेवकांचे धाबे दणाणले आहेत.
मुंबई महापालिकेच्या सभागृहात अनेक विषयांवर चर्चा केली जाते. विकास कामे मंजुर केली जातात. धोरणात्मक निर्णयही घेतले जातात. अशावेळी नगरसेवकांची हजेरी अत्यंत महत्त्वाची असते. केवळ हजेरी नाही तर पुरेशी संख्याही महत्त्वाची असते. पालिका सभागृहाच्या बैठकीला उपस्थित राहणाऱ्या नगरसेवकांना सभागृहाबाहेरील नोंदवहीमध्ये सही करून प्रवेश दिला जातो. परंतु अनेक वेळा नगरसेवक येथे हजर नसतात. तर काही नगरसेवक केवळ नोंदवहीत हजेरी लावून परस्पर घरी निघून जातात. अशावेळी महत्वाच्या निर्णयावर निर्णय घेताना, राजकीय पक्षास अडचणीस सामोरे जावे लागते. अनेकदा काही नगरसेवक दोन दिवसांनंतर येऊन नोंदवहीत सही करतात, असे आरोपही करण्यात येतात. मुंबईतील समस्यांचे निराकरण करण्यासाठी नगरसेवकांना निवडून दिले जाते. मात्र, काही नगरसेवकांना सभागृहातील कामकाजाची माहिती नसते. परिणामी नगरसेवकांना वेसन घालण्यासाठी सभागृहाच्या दरवाजाच्यावर बायोमेट्रीक मशीन व सीसीटीव्ही यंत्रणा बसविण्यात यावी, अशी मागणी भाजपचे गटनेते मनोज कोटक यांनी केली होती. महापौरांनी ही मागणी मंजूर करुन पालिका आयुक्तांच्या अभिप्रायासाठी पाठवली. आयुक्त अजोय मेहता यांनी यावर सकारात्मक अभिप्राय देताना, सीसीटीव्ही यंत्रणा व बायोमेट्रीक मशीन लावण्याचे निर्दश प्रशासनाला दिले आहेत. यातून महापौर व उपमहापौर यांना वगळण्यात आले आहे. या निर्णयामुळे दांडीबहाद्दर नगरसेवकांना चाप बसणार असून सभागृहात येताना व जाताना दोन्ही वेळा हजेरी लावणे बंधनकारक राहणार आहे.