नववर्षांच्या स्वागतासाठी बेस्टच्या विशेष बसगाड्या

मुंबई (प्रतिनिधी) : नववर्षाच्या स्वागतासाठी ३१ डिसेंबरच्या रात्री मुंबईतील सागर किनाऱ्यावर येणाऱ्या नागरिकांच्या सोईकरिता बेस्ट उपक्रमामार्फत जादा बसगाड्या सोडण्यात येणार आहेत. सर्व प्रवाशांनी या सेवेचा लाभ घ्यावा, असे आवाहन बेस्ट परिवहन विभागाने केले आहे.
रविवार दिनांक ३१ डिसेंबर २०१७ च्या रात्री नववर्ष स्वागतासाठी गेटवे ऑफ इंडिया, जुहू चौपाटी, गोराई बीच आणि मुंबईतील इतर ठिकाणी समुद्र किनाऱ्यावर, चौपाटीवर रात्रीच्या वेळी फिरावयास जाणाऱ्या प्रवाशांच्या सोईसाठी बसमार्ग क्रमांक ७ मर्यादित,१११ ,११२ २०३, २३१, २४७ आणि २९४ वर रात्री १० वाजल्यापासून एकूण २० एकमजली जादा बसगाड्या सोडण्यात येणार आहेत. प्रवाशांच्या मदतीसाठी डॉ श्यामाप्रसाद मुखर्जी चौक, जुहू चौपाटी, गोराई बीच तसेच चर्चगेट स्थानक (पूर्व) आणि छत्रपती शिवाजी महाराज टर्मिनस इत्यादी ठिकाणी वाहतूक अधिकारी, बस निरीक्षकांची नेमणूक केली जाणार असल्याची माहिती बेस्टने दिली.