रत्नागिरी, 15 July : रत्नागिरी जिल्ह्यातील सर्वच भागांत पावसाची संततधार सुरू आहे. दरम्यान गेल्या 24 तासांत महारेनच्या अहवालानुसार जिल्ह्यात एकूण 687 मिलिमीटर पावसाची नोंद झाली आहे, तर सरासरी 76.33 मिलिमीटर पावसाची नोंद झाली आहे. सर्वाधिक पाऊस दापोली तालुक्यात झाला असून, दापोलीत तब्बल 118 मिमी पावसाची नोंद झाली आहे. त्याखालोखाल खेडमध्ये 93, रत्नागिरीत 91 मिमी पावसाची नोंद झाली आहे. तर चिपळूण आणि लांजा तालुक्यात 80 मिमी पावसाची नोंद झाली आहे. तर मंडणगडमध्ये 76 मिमी पावसाची नोंद झाली आहे.यावर्षी मान्सून दाखल झाल्यानंतर सुरुवातीला जिल्ह्यात चांगला पाऊस झाला. त्यानंतर मात्र काही दिवस पावसाने पुन्हा पाठ फिरवली. पण सध्या गेले काही दिवस जिल्ह्यात चांगला पाऊस होत आहे. आजही सकाळपासून पावसाची संततधार सुरू आहे.
दरम्यान यावर्षी जिल्ह्यात आजपर्यंत सरासरी 1607 मिमी पावसाची नोंद झाली आहे. तर पाऊस सुरू झाल्यापासून आजपर्यंत सर्वाधिक पाऊस राजापूर आणि दापोली तालुक्यात झाला आहे. राजापूरमध्ये 1854 मिमी, तर दापोलीत 1800 मिमी पावसाची नोंद झाली आहे. तर गुहागरमध्ये 1704 मिमी आणि लांजा तालुक्यात 1698 मिमी पावसाची नोंद झाली आहे.
